ނިމިދިޔަ އޮކްޓޫބަރ މަހުގެ 20 ވަނަ ދުވަހު އ.އ ހިމަންދޫ ސްކޫލްގެ މުވައްޒަފުން ތަޖުރިބާ ދަތުރެއްގައި ބޮޑުފޮޅުދޫ ސްކޫލަށް ޒިޔާރަތް ކޮށްފިއެވެ. މިދަތުރުގައި އެސްކޫލްގެ 36 މުވައްޒަކު ބައިވެރިވެފައި ވެއެވެ. ހިމަންދޫ ސްކޫލް ޕްރިންސިޕަލް އަލްފާޟިލާ ޒީނިޔާ އަހުމަދު މައުލޫމާތު ދެއްވިގޮތުގައި މި ދަތުރަކީ މިއަހަރުގެ މުދައްރިސުންގެ ދުވަސް ފާހަގަކުރުމުގެ ގޮތުންނާއި އަދި ބޮޑުފޮޅުދޫ ސްކޫލްގެ މަސައްކަތްތައް ރާވާ ހިންގަވަމުން ގެންދާގޮތް ބަލާ، އަމަލީ ތަޖުރިބާ ދެސްކޫލްގެ މުވައްޒަފުންނަށް ހިއްސާ ކޮށްލުމުގެ ބޭނުމުގައި ކުރެވުނު ދަތުރެކެވެ.
މިދަތުރުގެ ބައިވެރިނަށް ބޮޑުފޮޅުދޫ ސްކޫލްގެ މުވައްޒަފުންގެ ފަރާތުން ވަރަށް ހޫނު މަރުހަބާއެއް ކިޔާފައިވެއެވެ. މިދަތުރުގައި ތަޖުރިބާ ހިއްސާ ކުރުމަށް ސެކްޝަންތަކުގައި މަސއްކަތްކުރައްވާ މުވައްޒަފުން ގުރޫޕް ކޮށްލުމަށްފަހު ބޮޑުފޮޅުދޫ ސްކޫލްގެ މުވައްޒަފުންނާއި އެޓޭޗްކުރެވުޔނެވެ. އަދި ކޮންމެ ސެކްޝަނެއްގެ މަސައްކަތްތައް ރާވާލާފައިވާ ގޮތާ އަދި މަސައްކަތްތައް ކުރިއަށްދާގޮތުގެ މައުލޫމާތު ބަދަލުކުރެވުނެވެ.
މައިދާނީ ދަތުރުގެ ހިމަންދޫ ސްކޫލްގެ ބައިވެރިންނަށް ބޮޑުފޮޅުދޫ ސްކޫލާބެހޭ ވީޑިއޯ ޕްރެޒެންޓޭޝަނެއް ޕްރިންސިޕަލް މޫސާ ނިމާލް ހުށަހަޅުއްވާ ދެއްވިއެވެ. އަދި އެއަށްފަހު ސްކޫލްގެ މަސައްކަތްތަކާ ބެހޭގޮތުން މައުލޫމާތު ސާފުކުރެއްވުމަށް ސުވާލުކުރުމުގެ ފުރުސަތު ހުޅުވާލެއްވިއެވެ. މިދަތުރުގެ ބައިވެރިންނަށް އެދުރުންގެ ދުވަހުގެ މުނާސަބަތުގެ ބޮޑުފޮޅުދޫ ސްކޫލްގެ މުވައްޒަފުންގެ ފަރާތުން ކޮންމެ މުވައްޒަފަކަށް ހަދިޔާއެއް ދެވުނެވެ. ދަތުރު ނިންމާ، ހިމަންދޫސްކޫލްގެ ބައިވެރިން އެނބުރި ރަށަސްދިޔުމަށް ފުރާފައިވަނީ އެދުވަހު މެންދުރުފަހު 2.00ގައެވެ.
Leave a Reply