2018 ވަނަ އަހަރުގެ ބައިނަލް އަގުވާމީ މާދަރީ ބަހުގެ ދުވަސް ބޮޑުފޮޅުދޫ ސްކޫލްގައި ކުލަގަދަކޮށް ފާހަގަ ކޮށްފިއެވެ. ދުވަހުގެ ހަރަކާތްތައް ފެށިގެން ގޮސްފައިވަނީ ހެނދުނު 8.00 ގައި ބޭއްވުނު ޚާއްސަ އެސެމްބްލީއަކުންނެވެ. މި އެސެމްބްލީ ފައްޓަވާދެއްވީ ޤުރުއާނުގެ ބަރަކާތުން ގުރޭޑް 10 ދަރިވަރު އަބުދުﷲ ޞަފަޢާންއެވެ. އަދި ކިޔެވިދިޔަ އާޔަތްތަކުގެ މާނަ ހުށަހަޅާދީފައިވަނީ ގުރޭޑް 9 ގެ ދަރިވަރުން ފާތިމަތު މުޒުނާ އެވެ. އެއަށްފަހު ދުވަހުގެ މުނާސަބަތާ ގުޅޭގޮތުން ސްކޫލްގެ ކެޕްޓަން ގްރޭޑް 10 ގެ ދަރިވަރު ސާއިދާ ރަހުމާ އަހުމަދާއި އަދި ސްކޫލްގެ ވައިސް ކެޕްޓަން މުހައްމަދު ޝާފިޢު (ގްރޭޑް 10) ވާހަކަ ދެއްކެވިއެވެ. އެސެމްބްލީގައި ދެން ކުރިއަށް ގެންދެވުނީ ދަރިވަރުންގެ ފަރާތުން ހުށަހަޅާދެވުނު ރައިވަރާއި ޅެންކިޔުމުގެ ބައެވެ. މީގެ އިތުރުން ދުވަހާ ގުޅޭގޮތުން ގުރޭޑް 7 ގެ ދަރިވަރުންގެ ކުރު ޑްރާމާ އެއްވެސް ހުށަހަޅާދެވުނެވެ.
ޑަރާމާއަށްފަހު ސްކޫލްގެ ފަރާތުން ޕްރިންސިޕަލް މޫސާ ނިމާލް ދުވަހާގުޅޭގޮތުން ދަރިވަރުންނާ މުޚާތަބުކޮސް ވާހަކަދެއްކެވިއެވެ. ޕްރިންސިޕަލްގެ ވާހަކައިގައި މާދަރީބަހުގެ ދުވަހެއްގެ ގޮތުގައި ވަކި ދުވަހެއް ޚާއްސަކުރެވި މުޅިދުނިޔޭގެ އެކިކަންކޮޅުތަކުގައި ފާހަގަކުރެވެމުންދާ ސަބާމެދު ސުވާލު އުފައްދާ އޭގެ ބޭނުމުގެ މައްޗަށް އަލިއަޅުވާލެއްވިއެވެ. އަދި މިފަދަ ދުވަހެއްގައި ދަރިވަރުންނާއި މުދައްރިސުން އަދި ބެލެނިވެރިން ވިސްނުން ބަހައްޓަންވީ ކަންކަމުގެ މައްޗަށްވެސް ވާހަކަދެއްކެވިއެވެ. މީގެ އިތުރުން ޕްރިންސިޕަލް ވާހަކަކޮޅު ނިންމަވާލެއްވީ ދުވަހާގުޅޭގޮތުން ލ.ގަން ތޯހާ އަބޫބަކުރު ހައްދަވާފައިވާ ޅެމެއް ހުށަހަޅާދެއްވަމުންނެވެ.
އެސެންބްލީއަށްފަހު ދަރިވަރުންނަސް ކުރީޒަމާނުގެ އެކިއެކި މަސައްކަތް ކުރަން ގެއްގުޅުނު މަސައްކަތު އާލާތްތައް ދައްކާލެވުނެވެ. އަދި ބައެއް މަސއްކަތް ކުރާގޮތުގެ ނަމޫނާވެސް ދައްކާލެވުނެވެ.
ބައިނަލް އަގުވާމީ މާދަރީބަހުގެ ހަރަކާތްތަކުގައި ބޮޑުފޮޅުދޫ ސްކޫލްގެ ދަރިވަރުންނާއި މުދައްރިސުން އަދި މުވައްޒަފުންގެ އިތުރުން ގިނަ އަދަދެއްގެ ބެލެނިވެރިން ހާޒިރުވެފައި ވާކަން ފާހަގަކުރެވުނެވެ.
Leave a Reply