މިއަދު ކުޅެވުނު ފުޓްސަލް މުބާރާތުގެ ދެވަނަ މެޗުގައި ބައްދަލުކޮށްފައިވަނީ ކާނި ހައުސް އަދި ފުނަ ހައުސްގެ ޓީމެވެ. މިއަދު ހެނދުނު 6.30ގައި ކުޅެން ފުށުނު މިމެޗްގެ ފުރަތަމަ ހާފުގައި ދެ ޓީމުންވެސް ކުޅެފައިވަނީ ދާދި އެއްވަރެއްގައެވެ. އެހެންނަމަވެސް މެޗްގެ ފުރަތަމަ ހާފުގެ ފަހު ދިހަމިނިޓްގައި ކާނިން ފުރަތަމަ ގޯލް ކާމިޔާބުކޮށް މެޗްގެ ލީޑް ނެގިއެވެ. އަދި ފުރަތަމަ ހާފުގެ ކުޅުން ނިމުނީ 1-0 ކާނި ހައުސްގެ ޓީމު ކުރީގަ އޮވެގެންނެވެ. ދެވަނަ ހާފުގެ ކުޅުން ފެށުމާއިއެކު ފުނަހައުސް ޓީމަށް ގޯލް ސްކޯ ކުރަން ރަނގަޅު ފުރުސަތެއް ލިބުނު ނަމަވެސް އެފުރުސަތުގެ ބޭނުން ހިފިފައެއް ނުވެއެވެ. ނަތީޖާ އަކީ ކާނި ޓީމުން އެމީހުންގެ ދެވަނަ ގޯލް ކާމިޔާބުކޮށް މެޗުގެ ލީޑް ފުޅާކުރުމެވެ. މިމެޗް ނިމިފައިވަނީ 2-0 ގެ ނަތީޖާ އާއެކު ކާނިހައުސްޓީމު މެޗް ކާމިޔާބުކޮށްގެނެވެ.
މިމުބާރާތުގެ ފުރަމަ މެޗްގައި ފުނަހައުސްވަނީ މިދިއްޔާ ބައްދަލުކޮށް ބަލިވެފައިކަމުން މިއަދުގެ މެޗްގެ ނަތީޖާއިން މިމުބާރާތުގެ ފައިނަލުގައި ކުޅޭނެ ދެ ޓީމު މިހާރު މިވަނީ ކަށަވަރުކުރެވިފައެވެ. އެގޮތުން ފައިނަލްގައި ބައްދަލުކުރާނީ މިދިލި އަދި ކާނި ހައުސްގެ ޓީމެވެ. މިރޭ 8.30 ގައި މިމުބާރާތުގެ 3 ވަނަ މެޗްގެ ކުޅުން ކުރިއަށް ދާނެއެވެ. މިމެޗްގައި ބައްދަލުކުރާނީ މިދިލި އަދި ކާންޏެވެ.
ހޭންޑް ބޯޅަ މުބާރާތުގެ ތިންވަނަ މެޗުގެ ކުޅުން ކުރިއަށް ދާނީ މިއަދު ހަވީރު 4.30 ގައި ހޭންޑްބޯޅަ ކޯޓުގައެވެ. މިމެޗުގައި ބައްދަލުކުރާނީ ކާނި އަދި ފުނައެވެ. މިމެޗުން މޮޅުވާ ޓީމަކަށް ފައިނަލްގެ ދެވަނަ ޖާގަ ކަށަވަރުވެގެން ދާނެއެވެ. އެހެން ކަމުން މިއަދު ހަވީރު ކުޅެވޭ ހޭންޑް ބޯޅަ މެޗުވެގެންދާނީ ވަރަށް ގަދަ އަދި ދެ ޓީމަށްވެސް ވަރަށް މުހިންމު މެޗަކަށެވެ.
Leave a Reply